Rubriche - “T’la scriv in Piasintein”
Nona puntata della rubrica curata da Pietro "Pedar" Rebecchi, attore piacentino nella compagnia teatrale Famiglia Piasenteina e tifoso di lunga data del Piacenza Calcio. Per tutta la stagione il Pedar racconterà pensieri, fatti e aneddoti legati al mondo del Piace: ovviamente in rigoroso dialetto piacentino
Finalmeint è ricuminciä 'l campiunäd, as pö turnä a palpitä pr'i noss culur. Parchè i pölan anca fäm vëd tütt le "supercoppe" ad domine e Diu ma andä a fä il tifu par la squädra di tò sass insëma a tütt i fassi da s'giaff ch'illa peinsan tant cme te l'è tütt un ätar pär ad managh, e anca un tocch ad camisa. Al periud dal marcä invarnäl al m'ha seimpar fatt surrid, basta surciä i cummeint d'intenditur che, ad solit, i cugniussan benissim i sugadur növ, anca se magäri i saptävan in si camp ad quälca squädra ad paes o in settur giuanil. Cmi fagan l'è seimpar stä un mistero, parlum mia se vöi di növ l'è stä tesserä par rimpiassä un ätar che a lur al piasiva mia. Me preferiss aspettä sett o ott partid prima da sentensiä, tropp voot ho vist di sugadur chi gävan da spaccä 'l mond e inveci ien stä bon gnian da romp una nissöla, ätar inveci arrivä insëma a una camiunä 'd dübbi chi s' en rilevä bon abota.
Tant l'è inütil, imbruccäia tütt l'è impussibil, sariss mèi pinsä al fatt ca la sucietä l'ha sarcä da cambiä mia tant par fäl ma par dä al prugett una pruspettiva impruntä anca al futuro.
Anca me, tant cme ' l mister, m'aspettäva quälcosa ad pö ma la ga sta, prubabilmeint al famigerä "richiamo atletico" l'ha un pò appesantì i gallon. Sicürameint pudum sügä mèi, gh'è stä un mumeint che a füria ad lancion ad sinquanta metar s'avrissma sügä in un camp ad magiustar cul ballon n'avrisma schissä gnian vüna. Bisugnariss anca infurmä 'l frances che quand al tira i corner sariss mèi mëtt la balla in area, centrä in pienu 'l difensur dadnas a lü al sèrva a gninta, sultant a fäm ricurdä Patrascu.
All'inisi e alla fein ad la partida uvasion par "bomber Marzeglia", indimenticä prutagunista dl'ann passä. Me sum rastä fedel alla linea c'ho aduttä da tant ann ciuè "niente cori per i giocatori" però g'ho ciuccä 'l man abota e avluntera.
Adess du partid föra ad cà, quindi pr'un pò 'd teimp av luiarò mia, la prossima però sarà 'l dèrby, al ciod al cumincia a batt, un pensier tütt i dè l'è dedicä al dudas ad Farvär e ho sà immaginä una diseina ad voot al tipu ad partida ca vuriss vëd, alla fein però al risültäd l'era seimpar qull.
M'arcmand forza Piace!
Pedar