La rubrica del Pedar: "T'la scriv in Piasintein"
Quindicesima puntata della rubrica curata da Pietro "Pedar" Rebecchi, attore piacentino nella compagnia teatrale Famiglia Piasenteina e tifoso di lunga data del Piacenza Calcio. Per tutta la stagione il Pedar ha raccontato pensieri, fatti e aneddoti legati al mondo del Piace: ovviamente in rigoroso dialetto piacentino
Bon, anca qusta l'ho vista, dü dè pr'una partida. Menu mäl gh'era mia i süpplementär se no andämma inans fein a Nadäl. Am sariss cär savì parchè gh'è stä dla gint che duminca i sen mia vist, tant cme andä al cinu e vegn' föra prima dal finäl o andä con una donna e....si insuma i samò capì no? Anca al Prato g'um datt una bella tusäda e i ragass ian dimusträ, ancura una vota, d'avigh un cör atsè. Am dispiäs par Layeni (e chemò agh vuriss la fassiëtta ad uostap cul lagrim a i'occ') c'al vuriva fä un gol e inveci....
Adessa sutta cui play off e am sügerissa una roba ca süccederà mia ma sa sücceda am mëtt al post d'un Farnese, in sal cavall cun la bandera dal Piace. Incö l'è l'ültim articul ca scriv (a menu che...) e g'ho da valütä se fäia anca 'l prossim campiunäd parchè ist'ann ho guadagnä gnan un vöi ma pr'al prossim i m'han imprumiss al duppi.
In chi mès che g'ho avì quäsi sesmila visualisassion, mia mäl e av ringrasi dal prufond dal cör, sper propi d'aviv s'ciancä quälca surris e d'ogni tant d'avì lüsträ al voss urgoli da iess piasintein e tifus dal Piace. Vuriss fä una dedica speciäla a cla nunneina ca leza i me articul a sò anvud parchè lü l'è mia bon e da quand alla fà la s' infurma seimpar dal risültäd.
Anca sultant un tifus növ l'è sà un sücess. Un ringrasiameint particulär a Giacomo Spotti e a tütta la redasion ad Sportpiacenza parchè, ad tütt i mezu d'infurmasion ca gh'è a Piaseinza l'è stä l'ünich a dä un pò da spasi (oltretütt seinsa filtar) al noss dialëtt' i'ätar ien bon sultant da scriv c'alla pärla pö atsoi.
Duminca tütt a städi, matumas in dill cundision d'arrivä alla fein cun la cuscinsa bianca cme un linsö e par l'amur ad tütt i sant vistiv mia cun dla roba blë che quäldoi va in confüsion e i tiran a man di pulintein ca sta nè in ciel nè in terra.
Av salüt e ancura una vota...
M'arcmand forza Piace !
Pedar