La rubrica del Pedar: "T'la scriv in Piasintein"
Rubrica curata da Pietro "Pedar" Rebecchi, attore piacentino nella compagnia teatrale Famiglia Piasenteina e tifoso di lunga data. Per tutta la stagione racconterà pensieri, fatti e aneddoti legati al mondo del Piace: ovviamente in rigoroso dialetto piacentino
“ Di piccin lassat lé da fä vulä di cik-ciak datsà e dadlà o no? Che po' l'ätar patnä bein al sa sgionfa e la sgancia una giggiula. Insuma incuntriv da una patnadura e mattiv d'accordi parbaccu !”
In dua ha fallì l'onorevole Razzi pudriss avigh süccèss Stefano Gatti.
Va bein däi turnum a parlä seriameint, sicürameint i scunfitt dill prim du partid ien stä un tri e uttanta ma adess la squädra pär che pian pianein la sia drè a cattäs, l'ültma vittoria l'é arrivä anca cun di prugress ad sögh e quälca ragass pär propria cl'abbia imbruccä la strä giüsta.
Sum cunvint ca pudum migliurä la pusision ad l'ann passä e andä inans cul prugett, un pass alla vota, seinsa fä di vul tropp in äria che dopa a rüglä su' gh'è da romps ill coran. Intant gh'é anca un sponsor növ ca fa' 'l sücch ad limon, as sa', l'é un frütt ca streinsa, in sért partid, in di ültim minüd al pöl vegn' bon anca lü ätar che parsütt e turron.
Tra i sugadur növ (a pärt Fümagall ca cugniussima sa') second mé al migliur l'é stä Masciangelo, al curra cmé un matt, al ponta ca l'é un piaser e i pé im san abbastansa dus, s'al migliura un po' la qualitä in di cross l'é fatta, al fisich l'è mia da Marcantoni (mé di fatti al num in sla mäia al ga sta appéna appéna) ma 'l va tant fort ca pär c'al daspattena gnan l'érba. Brau padèlla !
Vuriva anca scriv dal peggiur e un päri ad num im vegnan in meint ma ho decis da fä 'l bräv....pr'adess. Mé mäi savì cär giüdicä un sugadur dopa un päri ad partid sügä mäl, pinsä ca gh'é in gir quälca fenomeno che dopa un teimp al sa sa' tütt, andì da lur.
M'arcmand forza Piace