La rubrica del Pedar: "T'la scriv in Piasintein"

Fradéll bianch e russ sum ancura che, parchè in dla vita ill rob sicür ien poch ma gh'é seimpar una növa stagion dal noss Piace c'al ga fa sbarbattä 'l cör pössé che una bella donna.
Un campiunäd ca cumincia in sla rincursa ad qull ad l'ann passä c'la regalä una sgiarlä ad suddisfasion ma che, l'é inütil ca fum feinta ad gninta, al sa preseinta cun quälca logica difficultä ad po'. La squädra l'é praticameint tütta növa, menu mäl che almenu il Mister l'é rastä di noss e la sucietä l'é mia rastä cul man in man, i'han guardä da tesserä di sugadur ad pruspettiva chi pölan dä cuntinuitä al prugett.
Ho sintì abota gint lamintäs pr'il cession ad Togò e Saber ma i garissan da capì dü rob, prima 'd tütt  al sämma benissim che se i dü sugadur iarissan fatt al campiunäd ca tütt sperämma i sarissan andä via e secundariameint vuriss chi ma spiegassan parché se i bon i van via dalla Juve i pölan mia andä via dal Piace. L'é una roda ca gira, noi purtum via vöi al Renate, a noi alla tira via il Carpi, al Carpi l'Udinese e via c'andum fein al Real Madrid. Prima s'na fum una ragion prima passa al mäl ad fidagh.
Püttost sum cunteint gnan un po' pr'un ätar mutiv : vadiva l'ura da fä la tradüsion in Piasintein di num ad tütt i sugadur e lur cus'ihann pinsä da fä ? Cumprä Sarzi Puttini, Scaccabarozzi e Masciangelo. Menu mäl ca gh'é Della Latta che par mé l'é sà dvintä Dallatolla e insëma a Ferri e Corazza i fan un triu d'assär, d'ätra pärt vist al mister dal Presideint....
Mäl cla faga cun chi num lé un post alla Steel Acciai par lur al ga sarà seimpar.
A pruposit, ho lsì che il Presideint unuräri l'è andä in Corea, sperum c'al vegna a cà alla svélta parchè l'é mia, in qull mumeint che, al post pössé tranquill dal mond. Che po' va a finì c'al ma tacca da lid cun Kim “sum patnä bein” Jong-un e süccéda un quarantott. Am pär sa da seintal :